Herbstreise der Damenriege vom 27. September 2020
Am 27. Septämber si 14 fitti Froue go reisle u d Chaufföse Ursina het aui föidau uf Brienz (Brienzwiler) brocht. Es het e Programmänderig gä wüu uf dr Axalp scho Schnee gläge isch und me nid het wöue im Schnee umestampfe. Somit isch d Reis ufe Ballebärg gange, wo‘s zum Teil usglasse u luschtig härgange isch. Trotz em Wätter wo du doch schöner isch gsi aus erwartet, si mir ir ganze Schwiz umecho. Zerscht im Bärnbiet, denn im Jura, vom Jura is Tessin, wo mir imne schöne Innehof zMittag gässe und vüu plouderet hei. (S
Schnäpsli het ou nid gfäut!).
Früsch gschtercht simer Richtig Zäntrauschwiz glüffe und nachere wüude Rösslispüu-Fahrt heimer im Dääge s’Kafi gno. Richtig Oschtschwiz simer no are Sagi verbi cho. Do hei är Roslä ihri Ouge aafo lüchte und si het em einte oder angere chönne Uskunft gä! Witer ischs em Bächli no zumne schönä Riighuus gange. Doch leider het Corona ou im Ballebärg nid Haut gmacht und mir hei dä Gwafförsalon nid chönne besichtige. Schad, Manuela, villech wärsch öppe no ufene nöii Idee cho, wie du die Gumiswiler-Froue chönntsch frisiere! So hei mir üsi Wanderig dür d’Schwiz beändet und si wieder am Afangsort aglangt. Die einte hei no öppis gänggerlet und die angere hei no s’Buuremuseum besichtiget. So, jetz ab i Bus und em z’Nachtässe entgäge! Zrugg übere Brünig, Luzärn zue si mir nach angerhaub Stung z’Huttu im Bahnhof acho. Dört simer no einisch vou inegläge und hei üs am Menü erfröit.
So isch dä Tag verbi gange und d’Ursina het üs gsung und satt wieder hei brocht. Jetz hoffe mir, s’nöchscht Johr sig de chli besser Wätter und mir chöi üsi Chräft chli meh isetze!!
